मुंबई पोलीस दलात पुन्हा अश्वदलाचा समावेश होणार
By VISHRANTI SHINDE | प्रकाशित: जानेवारी 20, 2020 01:32 PM 2019-02-12T14:15:30+5:30
शहर : मुंबई
मुंबई - पोलीस दलात तब्बल ८८ वर्षांनी पुन्हा अश्वदलांचा समावेश करण्यात येत आहे. येत्या २६ जानेवारी रोजी प्रजासत्ताक दिनी शिवाजी पार्क येथे होणाऱ्या ध्वजारोहणाच्या मुख्य शासकीय समारंभातील संचलनात हे पथक सहभागी होणार आहे. मुंबई पोलिसांचे अश्वदल वाहतूक नियंत्रण, गर्दी, चौपटीसारख्या ठिकाणी गस्त, नियंत्रणासाठी उपयुक्त ठरेल, असा विश्वास गृहमंत्री अनिल देशमुख यांनी रविवारी व्यक्त केला.
गृहमंत्री देशमुख यांनी शिवाजी पार्क येथील अश्वदलाची पाहणी करून माहिती घेतली. त्यानंतर त्यांनी पत्रकारांशी संवाद साधला. यापूर्वी पोलीस दलात माऊंटेड पोलीस युनिटद्वारे मुंबईच्या रस्त्यांवर गस्त घातली जात होती. परंतु, वाढत्या वाहनांमुळे डिसेंबर १९३२ मध्ये हे युनिट बंद करण्यात आले. आत्ता मुंबई पोलीस दलात अत्याधुनिक वाहने, वेगवान मोटारबाइक आहेत. मात्र, गर्दीच्या ठिकाणी गुन्हे नियंत्रित ठेवण्यासाठी अधिक प्रभावी ठरेल या दृष्टिकोनातून 'माऊंटेड पोलीस' उपयुक्त ठरतील हे लक्षात आले.
त्यानुसार स्वातंत्र्यानंतर पहिल्यांदाच अश्वदलाचा मुंबई पोलीस दलात समावेश करण्याचा निर्णय घेतला आहे, असे देशमुख म्हणाले. मुंबईतील वाढलेली रहदारी पाहता सण, महोत्सवाच्या दरम्यान, मोर्चे आदी प्रसंगी पादचाऱ्यांच्या गर्दीत घुसून परिस्थितीवर लक्ष व नियंत्रण ठेवणे शक्य होणार आहे. तसेच गर्दीमध्ये महिलांच्या सुरक्षिततेसाठी तसेच, गुन्हेगारी प्रवृत्तीच्या लोकांकडून होणारी अरेरावी, चोरी आदींवर वेळीच नियंत्रण आणण्यासाठी प्रभावी ठरेल.
'रायडर' घोड्यावर स्वार असल्यामुळे उंचावरून गर्दीवर लक्ष ठेवून काही चुकीचे घडत असल्यास तेथे गतीने जाता येईल. पायी चालणाऱ्या ३० पोलिसांइतकी प्रभावी कामगिरी एक अश्वस्वार पोलीस करू शकेल. आवश्यकता भासल्यास पुणे, नागपूर आदी शहरांतही असे पथक सुरू करण्याचा विचार आहे.
मरोळ येथील सशत्र पोलीस मुख्यालयात ३० अश्वांकरिता कायमस्वरूपी तबेला बांधण्यासाठी अडीच एकर जागेची निवड केली आहे, असे पोलीस आयुक्त बर्वे यांनी सांगितले. अश्वारूढ पोलिसांकडे वॉकीटॉकी देण्यात येणार असून, जलद संपर्कासाठी त्याचा उपयोग होईल. याशिवाय आवश्यक तेथील घटनांच्या व्हिडीओ रेकॉर्डिंगसाठी 'बॉडी माऊंटेड कॅमेरा'ही दिला जाईल.
मागे
जगातील सर्वात कमी उंचीच्या व्यक्तीचे निधन
नेपाळ - जगातील सर्वात कमी उंचीचा व्यक्ती खगेंद्र थापाचे नुकतेच ....
अधिक वाचापुढे
चर्चगेट-विरार एसी लोकलमध्येही खरेदी करता येणार
मुंबई - पश्चिम रेल्वेवरील चर्चगेट-विरार या एसी लोकलमध्ये प्रवाशा....
Read more
