लिपिक ते राष्ट्रपती... प्रणव मुखर्जी यांचा अविस्मरणीय प्रवास

By DAYANAND MOHITE | प्रकाशित: सप्टेंबर 01, 2020 12:37 PM 2019-02-12T14:15:30+5:30

शहर : देश

भारताचे माजी राष्ट्रपती प्रणव मुखर्जी यांचं निधन झालं आहे. प्रणव मुखर्जी यांना कोरोनाची लागण झाली होती. त्यांच्यावर रुग्णालयात उपचार सुरु होते. त्याच्यावर नुकतीच मेंदूची शस्त्रक्रिया झाली होती. प्रणव मुखर्जी यांना 2019 मध्ये भारतरत्न पुरस्काराने सन्मानित करण्यात आले. प्रणव मुखर्जी यांची प्रकृती बिघडल्यामुळे 10 ऑगस्टला त्यांना दिल्लीच्या आरआर रुग्णालयात दाखल करण्यात आले.

जन्म

प्रणव मुखर्जी स्वातंत्र्यसेनानी कामदा किंकर मुखर्जी आणि राजलक्ष्मी यांचे पूत्र होते. त्यांचा जन्म ११ डिसेंबर १९३५ रोजी पश्चिम बंगालच्या बीरभूम जिल्ह्यातील मिराती या छोट्या गावात झाला. काँग्रेसचे नेते म्हणून स्वातंत्र्यलढ्यात भाग घेतल्याबद्दल त्यांच्या वडिलांना कित्येकदा तुरुंगवास भोगावा लागला. कामदा किंकर हे अखिल भारतीय काँग्रेस कमिटी व पश्चिम बंगाल विधानपरिषदेचे सदस्य होते. तसेच जिल्हा काँग्रेस कमिटीचे अध्यक्ष अध्यक्ष होते.

कुटुंब

प्रणव मुखर्जी यांचा गायक आणि कलाकार शुभ्रा मुखर्जी यांच्याशी विवाह झाला होता. शुभ्रा मुखर्जी यांचं 18 ऑगस्ट 2015 रोजी निधन झाले. त्यांना अभिजीत मुखर्जी, इंद्रजित मुखर्जी आणि एक मुलगी शर्मिष्ठा मुखर्जी अशी ३ मुले आहेत. अभिजीत मुखर्जी हे दोन वेळा लोकसभेचे खासदार राहिले आहेत, तर शर्मिष्ठा यांनी काँग्रेसकडून विधानसभा निवडणूक लढवली आहे.

शिक्षण

प्रणव मुखर्जी यांनी त्यांचे प्राथमिक शिक्षण बीरभूम जिल्ह्यात केले. नंतर ते कोलकाता येथे गेले आणि तेथून त्यांनी राजकीयशास्त्र आणि इतिहासात एमए केले. तसेच त्यांनी कोलकाता विद्यापीठातून एलएलबीची पदवी देखील घेतली आहे.

करिअर

१९६३ मध्ये, प्रणव मुखर्जी यांनी कोलकातामधील डेप्युटी अकाउंटंट-जनरल (पोस्ट आणि टेलीग्राफ) कार्यालयात अप्पर डिव्हिजन लिपिक म्हणून कारकीर्द सुरू केली. यानंतर त्यांनी विद्यानगर महाविद्यालयात स्वत: च्याच महाविद्यालयात राज्यशास्त्राचे सहायक प्राध्यापक म्हणून शिक्षण दिले. राजकारणात येण्यापूर्वी त्यांनी देशेर डाक (मदरलँडचा कॉल) मासिकामध्ये पत्रकार म्हणूनही काम केले. नंतर १९६९ मध्ये त्यांनी राजकारणात प्रवेश केला आणि राष्ट्रपतीपदापर्यंत पोहोचले.

राजकारणात प्रवेश

प्रणव मुखर्जी यांना राजकारणात आणण्याचे श्रेय तत्कालीन पंतप्रधान इंदिरा गांधी यांना जाते. १९७४ मध्ये इंदिरा गांधी यांनी त्यांना उद्योग, जहाज वाहतूक, पोलाद व उद्योग राज्यमंत्री आणि अर्थ राज्यमंत्री बनवले होते.  १९८२ मध्ये ते इंदिरा गांधी यांच्या मंत्रिमंडळात भारताचे अर्थमंत्री झाले. १९८० ते १९८५ ते राज्यसभेचे नेते राहिले.

संसदीय जीवन

प्रणव मुखर्जी १९६९ मध्ये प्रथमच राज्यसभेवर निवडून गेले. ते पाच वेळा संसदेच्या उच्च सदनचे सदस्य होते. 2004 आणि 2009 च्या लोकसभा निवडणुका जिंकून ते लोकसभेत पोहोचले. मुखर्जी हे काँग्रेस कार्यकारी समितीचे सदस्य होते. 8 वर्ष लोकसभेचे सभागृह नेते होते. यशस्वी कामगिरी

सातव्या आणि आठव्या दशकात प्रणवदा यांची प्रादेशिक ग्रामीण बँका (१९७५) आणि भारतीय एक्झिम बँकसह नॅशनल बँक फॉर अ‍ॅग्रीकल्चर अँड रूरल डेव्हलपमेंट (१९८१-८२) च्या स्थापनेत भूमिका होती. केली. केंद्र आणि राज्य यांच्यात संसाधनांच्या वाटणीचे १९९१ मध्ये तयार करण्यात आलेल्या फॉर्म्युला आजही गाडगीळ-मुखर्जी फॉर्म्युला म्हणून ओळखले जाते.

न्यूयॉर्कमध्ये प्रकाशित झालेल्या युरो मनी या जर्नलने केलेल्या सर्वेक्षणात १९८४ मध्ये जगातील पहिल्या पाच अर्थमंत्र्यांमध्ये त्यांचा समावेश होता. २०१० मध्ये वर्ल्ड बँक व आंतरराष्ट्रीय नाणेनिधीसाठी जर्नल ऑफ रेकॉर्ड एमर्जिंग मार्केट्स यांच्याकडून प्रणव मुखर्जी यांना आशिया खंडाचे फायनान्स मिनिस्टर ऑफ द ईयर म्हणून घोषित केले गेले.

पदभार

प्रणव मुखर्जी हे १९९१ ते १९९६ या कालावधीत योजना आयोगाचे उपाध्यक्ष, १९९३ ते १९९५ या कालावधीत वाणिज्यमंत्री, १९९५-९६ परराष्ट्रमंत्री, २००४ ते २००६ संरक्षणमंत्री आणि २००६ ते २००९ परराष्ट्रमंत्री होते. २००९ ते २०१२ पर्यंत ते अर्थमंत्री होते. २०१२ मध्ये त्यांनी राष्ट्रपतीपदाची निवडणूक लढविण्यासाठी काँग्रेस आणि लोकसभेचा राजीनामा दिला होता.

मनमोहन सरकारमध्ये प्रणव मुखर्जी २००४ ते २०१२ दरम्यान प्रशासकीय सुधारणा, माहितीचा अधिकार, रोजगाराचा हक्क, अन्न सुरक्षा, ऊर्जा सुरक्षा, माहिती तंत्रज्ञान आणि दूरसंचार, भारतीय अद्वितीय ओळख प्राधिकरण, मेट्रो रेल्वेची स्थापना इत्यादी विविध विषयांवर स्थापन झालेल्या 95 हून अधिक मंत्री गटांचे अध्यक्ष होते.

पुरस्कार

मुखर्जींनी भारतीय अर्थव्यवस्था आणि राष्ट्रनिर्मिती यावर अनेक पुस्तके लिहिली आहेत. त्यांना अनेक पुरस्कार व सन्मान मिळाला. यामध्ये २००८ मध्ये पद्मविभूषण, १९९७ मध्ये सर्वोत्कृष्ट खासदार आणि २०११ मध्ये भारतातील सर्वोत्कृष्ट प्रशासक पुरस्कार यांचा समावेश आहे. जगातील अनेक विद्यापीठांनी त्यांना मानद डॉक्टरेट दिली. २०१९ मध्ये मोदी सरकारने त्यांचा देशाचा सर्वोच्च नागरी सन्मान भारतरत्न पुरस्कार देऊन सन्मान केला.

काँग्रेसशी मतभेद

राजीव गांधी यांच्यासोबत मतभेदांमुळे प्रणव मुखर्जी यांना १९८४ मध्ये अर्थमंत्रीपद सोडावे लागले. ते काँग्रेसपासून दूर गेले आणि अशी वेळ आली की प्रणव मुखर्जी यांनी नवीन राजकीय पक्ष स्थापन करावा लागला. त्यांनी नॅशनल सोशलिस्ट काँग्रेसची स्थापना केली. हा पक्ष काही चमत्कार करू शकला नाही. व्ही.पी. सिंह यांनी पक्ष सोडल्यानंतर काँग्रेसला आणखी एक हादरा बसला. यानंतर राजीव गांधी यांनी प्रणव मुखर्जीवर विश्वास ठेवला आणि त्यांना पक्षात आणले गेले. त्यांचा पक्ष 'नॅशनल सोशलिस्ट काँग्रेस' काँग्रेसमध्ये विलीन झाला.

प्रणव मुखर्जी हे परस्पर मतभेद विसरून प्रत्येक राजकीय पक्षाच्या व्यक्तीसोबत असलेल्या चांगल्या संबंधामुळे ओळखले जातील. मोदी सरकारने त्यांना भारतरत्न पुरस्कार दिला हे त्याचं उदाहरण आहे. मुत्सद्देगिरी, अर्थशास्त्र, राजकारण आणि संसदीय परंपरा यांचे खोल ज्ञान असलेले राजकारणी होते. राष्ट्रपती असतानाही त्यांनी अशी अनेक कामे केली जी एक लक्षात राहतील. त्यांची उणीव नेहमीच भारतीय राजकारणात जाणवत राहिल.

मागे

आता EMIवर सूट नाही; RBIची घोषणा

सध्या देशाची आर्थिक परिस्थिती कोरोनामुळे अत्यंत बिकट बनली आहे. त्यामुळे सा....

अधिक वाचा

पुढे  

रेल्वे पुन्हा रुळावर आणण्यासाठी हालचालींना वेग

कोरोना व्हायरसच्या संकटात लागू करण्यात आलेल्या अनलॉक ४.० ची सुरुवात सप्टें....

Read more