'शिवभोजन' थाळी राज्यभरात २६ जानेवारीपासून

By VISHRANTI SHINDE | प्रकाशित: जानेवारी 03, 2020 06:29 PM 2019-02-12T14:15:30+5:30

शहर : मुंबई

    गरीब आणि गरजूंना फक्त १० रुपयांत जेवणाची थाळी देणाऱ्या 'शिवभोजन' योजनेची २६ जानेवारीपासून राज्यभरात अंमलबजावणी होणार आहे. मुख्यमंत्री उद्धव ठाकरे यांनी या योजनेचा आज आढावा घेतला आणि या योजनेच्या अंमलबजावणीचे निर्देश दिले.

    नागपूर येथील हिवाळी अधिवेशनामध्ये मुख्यमंत्री ठाकरे यांनी शिवभोजन योजनेची घोषणा केली होती. त्यानंतर गेल्या महिन्याच्या अखेरीस मंत्रिमंडळानं या शिवभोजन योजनेला मान्यता दिली होती. ती सध्या प्रायोगिक तत्वावर सुरू करण्यात येणार होती. त्यासाठी तीन महिन्यांत ६ कोटी ४८ लाख रुपये खर्च अपेक्षित होता. प्रायोगिक तत्वावर सुरुवातीला ५० ठिकाणी शिवभोजन योजनेंतर्गत १० रुपयांत जेवणाची थाळी देण्यात येणार होती.

    या योजनेची आता राज्यभरात अंमलबजावणी करण्याचे निर्देश आज, शुक्रवारी मुख्यमंत्री उद्धव ठाकरे यांनी आढावा घेतल्यानंतर दिले.सरकारतर्फे सुरू करण्यात आलेल्या या शिवभोजन योजनेंतर्गत भोजनालयात प्रत्येकी ३० ग्रॅमच्या दोन चपात्या, १०० ग्रॅम भाजी, १०० ग्रॅम भात, १०० ग्रॅम वरण असलेली थाळी अवघ्या १० रुपयांत देण्यात येणार आहे.

     दरम्यान, महाविकास आघाडी सरकारची शिवभोजन योजना ही अटी-शर्तींमुळे विरोधकांच्या रडारवर आली होती. शिवभोजन योजनेतील अटी बघूनच भूक मरेल. या योजनेचे नाव बदलून अटीभोजन करा, अशी टीका माजी खासदार नीलेश राणे यांनी केली होती.

काय होत्या शिवभोजन थाळीसाठी अटी?
        जेवण दुपारी १२ ते २ याचा कालावधीत उपलब्ध असेल. प्रायोगिक तत्वावर सुरुवातीला जास्तीत जास्त १५० जणांनाच जेवण मिळेल. जेवणात ३० ग्रॅमच्या दोन चपात्या, १०० ग्रॅम भाजी, १०० ग्रॅम वरण व दीडशे ग्रॅम भात मिळेल. शिवभोजनालय चालवण्यासाठी संबंधिताकडं स्वत:ची पुरेशी जागा असावी. भोजनालयातील जेवण बाहेर घेऊन जाण्यास मनाई असेल. एका भोजनालयात किमान ७५ ते कमाल १५० थाळी भोजन उपलब्ध होईल.
 

मागे

अखेर जळगाव जिल्हा परिषदेत भाजपने बाजी मारली

        जळगाव - राज्याचं लक्ष लागलेल्या जळगाव जिल्हा परिषद अध्यक्षपदाच्�....

अधिक वाचा

पुढे  

८ जानेवारीच्या देशव्यापी संपाला सेनेचाही पाठींबा

       मोदी सरकारच्या कामगारविरोधी आणि जनविरोधी धोरणांच्या विरोधात ८ ज....

Read more